I kečč ay Azwaw
Aha ddu neγ teddiḍ, ttu ulac d ayen ur nelli !
Yerra-k i tuṭṭfa n lḥiḍ, dadda-k ğeḥḥa n yiḍelli.
Lsas s waḍu i tessuliḍ, ssqef ur tugadeḍ ad yeγli.
Tessiγzifeḍ tilin i yiḍ, ass d awezγi ad yeflali.
A takurt yennḍen s lxiḍ, tindac-im ur tent-yettwali.
Ur telli imi-k ffer tuγmas, γas rkant-ak ad afgent !
Lqut n tizeṭ d amessas, lehhu allen-ik γuṛ-s ur welhent.
Din din teqleḍ d ameγnas, allaγ-ik lkaγeḍ-is ḍebbεen-t.
Qqaṛen-ak yella uεessas, anef i wiyaḍ ma xedεen-t.
A win i γef ur yettali wass, nnger-ik yexten bubben-t.
Tadṣa d unecṛeḥ deg-k γunzan, acku tgiḍ i tḥila ccan.
Ssedhan-k mi d-ak-cnan, s ujewwed ul-ik i k-t-ččan.
Yak d iman-ik i k-yerran, tesḥerceḍ γer γuṛ-k uccen.
Lemmer tedfireḍ afennan, ulac anwa a k-iγaccen.
Rrnu-ten wigi k-yernan, γas akken ad cuffen ad feccen!
Tgiḍ tilisa i tarda, tessneḍ anida ad teğğeḍ ṣnan.
γas rran-ak tabarda, uli-k seg wid-ak yedṣan.
Tettεumuḍ di kra n temda, ulac yakk deg-s aman.
γuṛ-s teddem-ik tmedda, tewwi-k tesεeddayeḍ ussan.
Yal ass ma ifut iεedda, akken i k-id-yettaf win d-yusan.
Tlemdeḍ tesseṛwayeḍ laẓ , yal aseggas tettalseḍ.
I tyita iḥeffu uεekkaz, s ufus-ik i s-tt-id-neğğreḍ.
Lemmer d uzzal ad yerreẓ, uqeṛṛu-k yes-s tekkateḍ.
Iqjan qqaṛen-ak erreẓ, yal iḍ deg-sen tcebbleḍ.
Imi-k deg iḍ iteffeẓ, tafat mi d-tuli ad tefreḍ.
S yiwen udaṛ m' ara tbeddeḍ, tettsennid tεekkazt fell-ak.
Tqeṛḥeḍ izṛa tettdeggireḍ, tdelluḍ i waṭan lehlak.
Tγilleḍ ma teqleḍ-d ur teddireḍ, am akken tufiḍ ayla-k.
D tidet γuṛ-k tzewreḍ, d temlel ad terreḍ tebrek.
Ay amcum ziγ tettγadeḍ, d ammus ad tawiḍ yid-k.
A win yessuguten allus, yerra-k ucuffu am teylut.
γer tmusni aṭas n drus, i γef d-ak-lldin tawwurt.
Tagrest ma tbegs-ed agus, tessekfaleḍ-d s umekti lmut.
Tekkateḍ i usirem-ik afus, teččureḍ tirga-k d tafsut.
Ihi γas nebbh-ed lmus, ẓẓweṛ-k s iman-ik zzlut!
ẓriγ anida terriḍ adaṛ, anida ur tukileḍ γef ul-ik.
Akken ira yiwen yehdeṛ, duṛu ur teffeγ taxriṭ-ik.
Teddreγled ur telsiḍ nwadaṛ, maca da walant wallen-ik.
Deg annecta yiwen ur k-iγeddeṛ, ulac anwa i terfed tidi-k.
D tawaγit llah wekbeṛ, zzweṛ ssendi ifassen-ik!
Tezgiḍ deg udaḍ trefdeḍ, tesḥedreḍ medden walan.
Walan-k s yes-s tcehdeḍ, ḥala netta i yellan.
Amek almi i t-ttagadeḍ, γas akken ur yesεi imawlan?
I yemceyyeε-is-nni tdefreḍ, teẓriḍ iḥeqqa anwa i t-ilan?
Ma yehway-ak ad tesleḍ, wigi mačči d icilan.
Ssel-iy-id ayen akk tεettbeḍ, ur ttagad ur k-yettṛuḥ.
Atan tura i d-tluleḍ, anef a k-zzuzneγ di dduḥ.
Akken ibγu tiliḍ meqqreḍ, argu iman-ik d amecṭuḥ.
Yebbaḥ tiṭṭuḥ ad tizwiγeḍ, xic a mmi mummuc ifuḥ.
Xerṣum yiwen wass ma tesneḍ, tamusni fell-ak ur tettcuḥ.
Xic a mmi. Mummuc ifuḥ.
M' ar ad yeγḍel isiḍ yesγi, neγ iγyal m' ara smeṛmiγen.
D ccwal di yal amḍiq ma yemγi, neγ d aman zeddigen i iluγen.
*
Yečča-yi weqjun-nneγ, ẓriγ a medden ad tedṣem.
S teqṛeḥ n wegzar i walaγ, ma d nnεac yuker-iyi asusem.
*
Ul yebges agus s allaγ, yekkes-as lγem deg tegrest.
Seg imiren iḍes ur twalaγ, i yeffer udem-is γef tebγest.
*
Tidet tettreqṛiq am yetri, neγ am isufa m’ ara ṛeqqen.
S tmedyazt tasa n tẓuri, s iḥulfan-is iṛqaqen.
*
A win yettruẓun lemri, tettnadiḍ iman-ik deg-s.
Tezliḍ di lεid ikerri, ul-ik s imenγi i d-yebges.
*
Ssaked deg-k a win ur neẓri, qqen asefru-w d asegres.
ṭṭef tunṭict n tayri, ssendi iciwi-k γuṛ-s!
*
Ssenteḍ tikta-w i tmuγli-k, ferreẓ isennan deg tmurt.
Tafat lldi-yas allen-ik, ssfeḍ tamuγli-k taqbuṛt!
*
Ay Azwaw ḥḥrez udem-ik, tidet teččuṛ-ak-d tawwurt.
Ssemneε yes-s iman-ik, fsi γef uqeṛṛu-k takurt!
*
Turgaḍ ayen i deg ur telliḍ, telliḍ deg ayen ur turgaḍ.
S wallen nniḍen tettwaliḍ, tiṭ-ik deg-k tettagad.
Yenkeẓ yezṛi-k ur teẓriḍ, tamuγli-k ur tessegmaḍ.
Tγilleḍ tekkreḍ kečč teγliḍ, tiγṛit ul-is d asemmaḍ.
Argu, ssfillet, ssirem, ccḍeḥ-as i uwezγi γef tmiṭ!
Akud d ayen ur d-nnγeṛṛem, γas kečč γer γuṛ-k teğğiḍ-t.
Taẓellt tenta ur d-tqeṛṛem, atta tidet tugi tiṭ:
Teqṛeḥ deg iḥulfan-is tedrem, tγum iman-is s tceṭṭiṭ.
Ay Azwaw yeddren akka, i tlelli acu i s-d-ssukseḍ?
Twahhaḍ allen-ik γer mekka, deg weεrur i ğeṛğeṛ tmekkneḍ.
Ay Azwaw aqbuṛ yerka, akid seg iḍes tekkreḍ!
Ssufeγ uccen si tferka, ma d tidet ur tettagadeḍ!
Anef-as i waḍu ad isuḍ, ur s-teddu di lebγi!
Ay Azwaw lemmer tceffuḍ, yewwi kra yellan yemγi.
Yessefk tura ad testufuḍ, seg ul-ik ad temḥuḍ,
ur k-t-yessendaw am yiγi.
In-as deg-i ur tetthuzzuḍ, kker ay aḍu ad telḥuḍ,
ur stufaγ i imenγi!
**
Dayen ur ttnaγ γef waḍu, ur ttnal deg-s ur reggi!
Teğğam abeḥri-s a ken-yebḍu, dacu d tamacahut-agi?
D wagi i d abrid n reḍḍu, ay Azwaw xxḍu!
Idim aṭas i yengi.
In-as ssali asuḍu, neεya deg luḍu,
aql-aγ nuki-d ass-agi!
**
Aḍu seg-k a t-ssufγeḍ, fell-ak ad telhu tegnawt.
S tlelli d tizeṭ ad tḥemmleḍ, ad tzewğeḍ s war taεmamt.
Deg iman-ik ad tafeḍ, seg ul ad tedseḍ,
ul i deg ur d-tegri teεdawt.
S tezwawt ad tesmuzγeḍ, tutlayt-ik ad tḥemmleḍ,
s yes-s i k-d-wwiγ tafat.
**
Tafat yes-s i k-tt-id-wwiγ, yak deg-s aḍu ur d-yettεeddi.
Lemmer ur tt-ssineγ ass-a ur tt-ufiγ, wissen tiṭ-iw ma ad teldi.
Taqellaεt ur tt-ttwaliγ, ad ccḍeγ deg-s ad γliγ,
yak ulac anida ur tendi.
Ma tγilleḍ ulac dacu ẓriγ, aḍu-agi i deg ttibbiγ,
deg ifassen-ik γuṛ-s ssendi!
**
Ssendiy-as ifassen-ik, cennu imeslayen-agi s tmuzigt-nni n tezlitt:
„ Ay asγerṣif, ay asγersif, uğweγ-d amud uγilif”
n Lwennas, kečč qqaṛ-as:
“ Ay agemmaḍ, ay agemmaḍ, tiṭ-iw γuṛ-k ur tessegmaḍ”.
